Beneficial decision of EPFO on Pension Calculation in Telugu

EPFO: ఎంప్లాయీస్ ప్రావిడెంట్ ఫండ్ ఆర్గనైజేషన్ (ఈపీఎఫ్‌ ఓ) తాజాగా కీలక నిర్ణయం తీసుకుంది.

అధిక పింఛను కోసం దరఖాస్తు చేసుకున్న వారికి భారీ ఊరట కల్పించింది. రవూర్కెలా ఆఫీసు ప్రతిపాదించిన పార్ట్‌-1, పార్ట్‌-2 లెక్కింపు విధానాన్ని పక్కన పెట్టినట్లు ఈపీఎఫ్‌ఓ వెల్లడించింది.

ఉద్యోగుల పింఛను పథకం (ఈపీఎస్‌) పేరా 12 కింద పేర్కొన్న ఫార్ములా ప్రకారమే పెన్షన్ లెక్కించి అందజేస్తామని స్పష్టం చేసింది. దీంతో అర్హులందరికీ ఉపశమనం లభించినట్లయింది. గౌరవప్రదమైన పెన్షన్ లభించేందుకు మార్గం సుగమమైంది.

దరఖాస్తులు పరిశీలించిన తరువాత అర్హత కలిగిన విశ్రాంత ఉద్యోగులకు పదవీ విరమణ తేదీ నుంచి పెన్షన్ మంజూరయ్యే సమయం వరకు రావాల్సిన నెల వారీ బకాయిలపై ఆదాయ పన్ను (టీడీఎస్‌) మినహాయిస్తామని ప్రకటించింది ఈపీఎఫ్ఓ.

ఈ మేరకు అర్హతలపై ఈపీఎఫ్‌ఓ వివరణ ఇస్తూ కీలక ప్రకటన చేసింది.

EPS95 Pension Latest News

Please Press Below to Subscribe.

పెన్షన్ లెక్కింపుపై స్పష్టత రావడంతో ప్రాంతీయ ఆఫీసులు దరఖాస్తుల పరిష్కార ప్రక్రియను మొదలు పెట్టాయని తెలిపింది. డిమాండ్‌ నోటీసుల మేరకు ఈపీఎస్‌ బకాయిలు చెల్లించిన విశ్రాంత ఉద్యోగులకు త్వరలోనే పెన్షన్ మంజూరు పత్రాలు జారీ చేసి, బకాయిలు విడుదల చేసేందుకు కార్యాచరణ చేపట్టినట్లు తెలిపింది.

ఎలాంటి ఆధారాలు లేకుండా సమర్పించిన దరఖాస్తులను ఏకపక్షంగా తిరస్కరించమని.. అవసరమైన పత్రాలన్నీ ఉద్యోగి లేదా యజమాని నుంచి తీసుకుని పరిశీలిస్తామని వెల్లడించింది.

అర్హత లేని దరఖాస్తులు మాత్రమే తిరస్కరిస్తామని పేర్కొంది. అధిక పెన్షన్ ఆశావాహుల నుంచి వస్తున్న వివిధ ప్రశ్నలకు సమాధానాలు వెల్లడించింది ఈపీఎఫ్ఓ.

ఒక ఉద్యోగి 2014 సెప్టెంబరు 1వ తేదీ కన్నా ముందు పదవీ విరమణ చేస్తే.. ఆ ఉద్యోగికి పింఛను చెల్లింపు 2014 సెప్టెంబరు 1కి ముందు ప్రారంభమవుతుంది. అప్పుడు ఆయన చివరి 12 నెలల వేతన సగటు ఆధారంగా పింఛను లెక్కిస్తారు.


మరో ఉద్యోగి 2014 సెప్టెంబరు 1వ తేదీ కన్నా ముందు.. 58 ఏళ్ల వయసు నిండకుండానే ఉద్యోగ విరమణ చేయడం.. మరో కేసులో ఉద్యోగి 2014 సెప్టెంబరు 1వ తేదీ తర్వాత 58 ఏళ్లు నిండాక పదవీ విరమణ చేశారనుకుందాం. వీరిద్దరికీ 2014 సెప్టెంబరు 1 తర్వాతి నుంచి పెన్షన్ ప్రారంభమయ్యే పరిస్థితి ఉంటుంది. వారి చివరి 60 నెలల సగటు వేతనాన్ని పరిగణనలోకి తీసుకుని పెన్షన్ లెక్క కడతారు.


ఒక ఉద్యోగి ఓ సంస్థలో 2015 జనవరి 1వ తేదీ నాటికి 60 ఏళ్ల వయసులో పదవీ విరమణ చేశారనుకుంటే.. ఈపీఎఫ్‌ఓ నిబంధనల ప్రకారం అతని పదవీ విరమణ వయసును 60 ఏళ్లుగా కాకుండా.. 58 ఏళ్లుగానే లెక్కిస్తారు. ఎందుకంటే ఆ ఉద్యోగికి 58 ఏళ్లు నిండగానే ఈపీఎస్‌ నుంచి బయటకు వచ్చేసినట్లవుతుంది. దీని ప్రకారం చూస్తే అతను ఉద్యోగ విరమణ 2014 సెప్టెంబరు 1 కన్నా ముందుగానే చేసినట్లు పరిగణిస్తారు. దీంతో ఈపీఎస్‌ నుంచి బయటకు వచ్చిన నాటికి చివరి 12 నెలల వేతన సగటు తీసుకుని పెన్షన్ ఖరారు చేస్తారు.


మరో వ్యక్తి ఓ సంస్థలో 50 ఏళ్లకే (2012 జనవరి 1వ తేదీ నాటికి) ఉద్యోగ విరమణ చేశారు అనుకుంటే.. అతనికి 58 ఏళ్ల తర్వాత నుంచి అంటే 2014 సెప్టెంబరు 1వ తేదీ తరువాత పెన్షన్ ప్రారంభమవుతుంది.


ప్రస్తుతం సర్వీసులో ఉన్న ఉద్యోగి 2030లో పదవీ విరమణ చేయనున్నట్లయితే.. అతని పదవీ విరమణ చేసిన తరువాత పింఛను లెక్కింపు ప్రారంభమయ్యే నాటికి ఉద్యోగుల పెన్షన్ పథకం (ఈపీఎస్‌)-1995 చట్టంలో అప్పటికి అమల్లో ఉన్న నిబంధనల మేరకు పింఛను లెక్కిస్తారు.